Russiski sendiharrin í Danmark: Føroyar seta fiskivinnusamstarvið í vanda

- Setir landsstýrið russisk reiðarí á svartalista í Føroyum, kann tað fáa avleiðingar fyri fiskivinnusamstarvið.

Tað sigur russiski sendiharrin í Danmark, Vladimir Barbin, í skrivligum svari til DR.

Sendiharrin skrivar, at ætlanirnar um at seta revsitiltøk í verk móti russiskum fyritøkum, setir eitt framhaldandi samstarv á fiskivinnuøkinum í vanda.

Russisku reiðaríini Murman Seafood og Norebo JSC eru á svartalista hjá ES, Noregi og Íslandi, tí tey eru undir illgruna at vera við í njósnaravirksemi.

Men hesum vísir russiski sendiharrin í Danmark aftur.

- Herferðin móti russiskum reiðaríum er bygd á ógrundaðar gitingar, skrivar hann.

Landsstýrið hevur biðið løgtingið um víðkaðar heimildir at seta tiltøk í verk móti Russlandi og Hvítarusslandi.

Murman Seafood eigur millum annað skipini Melkart 2 og Ostankino, sum hava rætt at fiska í føroyskum sjógvi.