Kanna broytingar av krabba í tjúkktarmi og endatarmi

Á Skurðdeplinum á Landssjúkrahúsinum eru tey farin undir at kanna, hvussu krabbi í tjúkktarmi og endatarmi í Føroyum er broyttur seinastu árini.

- Vit vilja kanna sjúkumynstur, hvussu sjúkan verður uppdagað og sjúkugongdina, sigur Maria Winther Dalsgaard, introlækni í maga- og tarmkirurgi, sum stendur á odda fyri verkætlanini. 

Maria Winther Dalsgaard

Maria Witnher Dalsgaard. (Mynd: Bjarni Árting Rubeksen)

Fyri at læra og skilja munin á sjúkumynstrum, umframt at betra um viðgerðartilboðini og útlitini fyri føroyskar sjúklingar, verða føroysku úrslitini samanborin við tølini í Danmark og kanska í øðrum Norðurlondum.  

Samanborið við grannalondini, verða føroyingar oftari raktir av krabba í tjúkktarmi og endatarmi, men lutfalsliga fá doyggja av sjúkuni.

Hoyr innslag í útvarpstíðindunum: 

Verkætlanin fevnir um eitt breitt og tvørfakligt samstarv, har starvsfólk á Skurðdeplinum, Medisinska deplinum, Heilsugranskingareindini, Fróðskaparsetrinum og Center for Surgical Science (CSS) á Sjællands Universitetshospitali í Køge eru við.