Géza Dávid Turi fekk troyggjuna hjá Bruno Fernandes    

"Eg dugi ikki ordiliga at seta orð á kensluna, hvussu stórt tað var at vinna á Manchester United."

Tað ásannar føroyski landsliðsmiðvallarin, Géza Dávid Turi, sum í gjárkvøldið var við til at varpa mæta Manchester United út úr ensku EFL-steypakappingini við felag sínum Grimsby Town, ið spælir fjórðbestu deildini. 

"Vit vóru ikki úti og freiraðu tað sum soleiðis, men eg var fullkomiliga uppi at koyra eftir sigrinum og brotssparkinum, og eg fekk ikki blund í eyguni, fyrr enn klokkan fimm ella seks í morgun." 

Ein longri samrøða við Géza Dávid Turi kann hoyrast her:
- um United-sigurin og at skifta frá Víkingi til Grimsby 

....framhald av greinini undir myndini

Grimsby Town

Mynd: Grimsby Town á Facebook

22 milliónir fylgdu við

Géza Dávid Turi, ið byrjaði á bonkinum, kom inn í 64. minutti, tá støðan var 2-0 til Grimsby Town.

Og tá dysturin skuldi avgerðast við brotssparkskapping, eftir at United móti endanum fekk javnað, gjørdist føroyski landsliðsleikarin ein at skýttunum. 

"Eg hevði vant brotsspørk, og ein vinmaður segði, at eg skuldi skjóta niður í vinstra horn, so tað gjørdi eg," greiðir Géza Dávid Turi frá. 

Hann ásannar tó, at tað var ein spent støða at skula bæði á vøllin at spæla móti øllum stjørnunum, men eisini fram at skjóta eitt brotssparkt, tá 22 milliónir fólk kring heimin fylgdu við. 

"Eg hugdi beint upp á Onana (Manchester United-málverjin), tá eg hevði lagt bóltin á blettin, men hann hugdi beint upp á bóltin, so eg fekk ikki nógv frá honum. Tíbertur fór bólturin í málið."

Geza David Turi

Ein glaður Géza Dávid Turi eftir at sigurin móti Manchester United er ein veruleiki (Mynd: Grimsby Town á Facebook)

Sheffield Wednesday næst

Géza Dávid Turi heldur, at Manchester United-leikararnir undirmettu Grimsby-leikararnar.

"Teir blivu eitt sindur kløkkir, tá dysturin byrjaði, tí teir høvdu ikki roknað við, at eitt lið úr lægru deildunum kundi pressað teir so høgt og í grundini spæla teir niður."

Næsta á skránni hjá Grimsby Town í Carabao Cup-steypakappingini er Sheffield Wednesday. 

Géza Dávid Turi

Troyggjan hjá Manchester United-liðskiparanum, Bruno Fernandes (Mynd: Géza Dávid Turi)

Í posa og sekk

Sigast kann ikki annað, at Géza Dávid Turi fekk upp í posa og sekk í gjárkvøldið.

Umframt sigurin á United, so fekk hann eisini troyggjuna hjá United-liðskiparanum, Bruno Fernandes, við heim. 

"Eftir dystin, so sá eg, at hann (Bruno Fernandes) sat uttanfyri skiftingarrúmið hjá Manchester United. Eg fór so yvir og tók í hondina á honum og takkaði fyri dystin, og hann takkaði aftur. Og hóast eg tók eitt sindur synd í honum, tí hann sá so ómetaliga keddur út, so spurdi eg alíkavæl, um eg kundi fáa blusuna hjá honum, og tað segði hann ja til. Eg skuldi bara hava blusuna," greiðir ein ovurfegin Géza Dávid Turi frá. 

Grimsby Town

Glaðir Grimsby Town leikarar, tá sigurin er í hús (Mynd: Géza Dávid Turi)