Airbnb í Havn: Borgarstjórin vil hava víðari heimildir

Borgarstjórin í Havn vil hava víðari heimildir frá landsstýrinum, nú tað vísir seg, at høvuðsstaðurin hevur flestar Airbnb-búeindir fyri hvønn íbúgva í øllum Norðurlondum.

Elsa Berg bíðar eftir, at landsstýrið gevur kommununum fleiri heimildir, millum annað at avmarka stutttíðarleigu, so Airbnb og líknandi fyritøkur fylgja føroyskum reglum.

Elsa Berg

Elsa Berg, borgarstjóri í Tórshavnar kommunu. 

17,7 búeindir

Í fjør hevði Tórshavnar kommuna 17,7 Airbnb-búeindir fyri hvørjar 1.000 íbúgvar, og tað er tað mesta í øllum Norðurlondum, sambært týska dátugrunninum, Statista. 

Reykjavík er nummar tvey í Norðurlondum við 17,4 búeindum, meðan Keypmannahavn hevur triðflestar Airbnb-búeindir, 15,3.

Nummar fýra er Stokkhólm, nummar fimm Oslo, og nummar seks er Helsinki við 4,5 Airbnb-búeindum fyri hvørjar 1.000 íbúgvar.

Statista hevur roknað dáturnar út við at býta talið av Airbnb-búeindum við fólkatalið í býunum.

Hoyr innslag í útvarpstíðindunum: 

Vit hava biðið Margit Stórá, landsstýriskvinnu í bústaðarmálum, um viðmerking. 

Men hon sigur, at stutttíðarleiga og Airbnb eru vinnumál, og tí ikki hennara málsøki.

Sirið Stenberg, landssstýriskvinna í vinnumálum, var upptikin á landsstýrisfundi fyri døgurða, og tí ikki tøk til samrøðu.