Danmark keypir vápn, sum skulu ræða russar

Trygdarpolitiska støðan ger tað neyðugt hjá Danmark at útvega sær langtrøkkandi vápn, sum t.d. dronur og rakettir.

Tað segði Mette Frederiksen, forsætisráðharri, á tíðindafundi fyrr í dag saman við Lars Løkke Ramussen, uttanríkisráðharra, og Troels Lund Poulsen, verjumálaráðharra.

- Stjórnin hevur tikið prinsippavgerð um, at Danmark skal útbyggja hernaðarligu orkuna við langtøkkandi vápnum, sum kunnu raka mál hjá fíggindanum við stórari frástøðu.

- Støðan í Evropa og Danmark er álvarslig, og eingin ivi er um, at Russland verður ein hóttan í mong ár, segði Mette Frederiksen á tíðindafundinum.

Eingin ítøkilig hóttan 

Hon leggur dent á, at í løtuni er eingin ítøkilig hóttan úr Russlandi um álop á Danmark, men Russland er sum partur av krígnum í Ukraina í ferð við at flyta mørk, og Ukraina er ikki nóg mikið hjá russum. 

Vápnini, sum danska verjan ætlar at útvega sær, skulu ræða russar.

- Fyritreytin fyri okkara trygd er,  at vit eru før fyri at verja okkum, sigur Mette Frederiksen.

Henda ætlanin um vápnakeyp kemur aftrat henni, sum var kunngjørd í síðstu viku, um at Danmark fer at keypa loftverjuskipanir fyri slakar 60 milliardir kr.