Ólógligt at hava snús uppi á sær í Fraklandi

Næsta ár verður helst ólógligt at taka snús við í feriu til Fraklands. 

Franska stjórnin fyrireikar uppskot til samtyktar, um at tað verður ólógligt at hava snús uppi á sær.

Hetta skrivar E24, sum endurgevur svenska Aftonbladet. 

Í uppskotinum stendur, at frá mars næsta ár verður bannað at framleiða, innflyta, útflyta og at hava vørur, sum innihalda nikotin, at koyra í munnin.

Benjamin Dousa

Benjamin Dousa er ráðharri í svenskum uttanríkishandli. 

Royna st steåga uppskotinum

- Vit gera alt vit kunnu fyri at steðga og seinka hesum uppskotinum, sigur svenski uttanríkishandilsmálaráðharrin, Benjamin Dousa, við Aftonbladet.

Hann stúrir fyri, at fleiri ES-lond fara at gera sum Frakland og banna snúsi.

- Vit hava brúkt hvassasta amboðið, vit hava í okkara amboðskassa, sum á ES-máli eitur 'ein útgreinað yvirlýsing'. Hetta er eitt mál, sum hevur verið á okkara radara í fleiri mánaðir, sigur hann.

Snús, sum er vátt tubbak, er bannað at selja í øllum ES - uttan í Svøríki. Svøríki fekk varandi undantak, tá ið tað gjørdist limur í ES í 1995.