Formaðurin: Vit eru vorðin klókari eftir fundin við PET

Fregnartænastan hjá donsku løgregluni, PET, var við á fundinum í uttanlandsnevndini í morgun, har lógaruppskotið, sum gevur landsstýrinum víðari heimildir at seta revsitiltøk í verk móti Russlandi, var til umrøðu.

Umboðið fyri PET hevur greitt uttanlandsnevndini frá, hvat tey vita um russisku skipini.

Ítøkiliga snýr málið seg um at seta tvey russisk reiðarí, Murman SeaFood og Norebo JSC, á svartalista. Bæði reiðaríini eiga skip, sum fiska sambært galdandi fiskiveiðusáttmála millum Føroyar og Russland.

Uttanlandsnevnd og Sirið Stenberg

Sirið Stenberg, landsstýriskvinna í uttanríkismálum, og embætisfólk í aðalráðnum vóru eisini á fundi í uttanlandsnevndini í dag. (Mynd: Bjarni Árting Rubeksen)

Heimildin at revsa russisku reiðaríini byggir á ein illgruna hjá ES og Noreg, um at skip hjá reiðaríunum eru ein hóttan móti trygdini í okkara parti av heiminum. Ongar almennar ábendingar eru um, at skipini hava framt nakað ólógligt í føroyskum øki.

Bjarni Hammer, formaður í uttanlandsnevndini, sigur, at hann er vorðin klókari eftir fundin við PET í dag, og nú fer nevndin at hava fleiri innkallingar í málinum.

Hoyr samrøðu, sum John Johannessen gjørdi við Bjarna Hammer í útvarpstíðindunum: