Kirkjutænarar og hjálparfólk fáa løn eftir sáttmála hjá Starvsfelagnum

Uppskot um kunngerð um starvsviðurskifti og samsýning ella løn til kirkjutænarar og hjálparfólk í fólkakirkjuni er gjørt og sent til hoyringar.

Tað byggir á lógina um embæti og størv í fólkakirkjuni frá 2013.

Sambært uppskotinum um kunngerð kann samsýning ella løn fyri tænastur í mesta lagi vera samsvarandi tímalønini á lønarstigi 1 í sáttmálanum millum Fíggjarmálaráðið og Starvsfelagið.

Krevur arbeiðið heilt serstakar førleikar, kann samsýningin vera sambært øðrum sáttmála.

Urguleikarar

Serstakar treytir eru um urguleikarar.

Um urguleikari til dømis starvast hálva tíð ella meira enn tað, kann hann vera fastløntur.

Avtalur, sum ikki eru í samsvari við ásetingarnar í kunngerðini, og sum eru gjørdar, áðrenn kunngerðin kemur í gildi, skulu endurskoðast í seinasta lagi 1. januar 2027.

Kunngerðin um starvsviðurskifti og samsýning ella løn til kirkjutænarar og hjálparfólk í fólkakirkjuni kemur í gildi 1. januar 2026.