Semja um at kommunur fáa ábyrgd av øllum demensøkinum

Semja er millum landið og kommunurnar um at flyta ábyrgdina av demensøkinum til kommunurnar, soleiðis at tryggjað verður, at borgarar ikki detta niður ímillum skipanir. 

Í dag hava landsstýrismaðurin í almanna- og mentamálum, Eirikur í Jákupsstovu og formaðurin í Kommunufelagnum, Tórbjørn Jacobsen, havt fund um málið um at savna demensøkið hjá kommununum.

Sambært lógaruppskotinum skulu kommunur frameftir eisini veita borgarum undir fólkapensjónsaldur, sum hava demenssjúku, tilboð.

Natúrlig loysn

Mett verður, at hetta er ein góð og natúrlig loysn, sum tryggjar, at ábyrgdin verður greitt skipað og liggur hjá einum geira.

Flestu kommunurnar hava væl útbygd tilboð til fólkapensjónistar við demens, bæði búpláss og dagtilboð. Við broytingini slepst undan, at borgarar og avvarðandi teirra mugu venda sær til fleiri almennar myndugleikar.