Uttanlandsnevndin viðger aftur revsitiltøk móti Russlandi

Uttanlandsnevndin hjá løgtinginum fer aftur í morgin at viðgera lógaruppskotið, sum gevur landsstýrinum víðari heimildir at seta revsitiltøk í verk móti Russlandi.

Í morgin eru bæði landsstýriskvinnan í uttanríkis- og vinnumálum, og landsstýriskvinnan í fíggjarmálum boðsend at møta í nevndini. Og saman við Ruth Vang er eisini Taks boðsent.

Fyri trimum vikum síðani var danska fregnartænastan boðsend at møta í nevndini. Tá greiddi umboðið fyri PET Uttanlandsnevndini frá, hvat tey vita um russisku skipini.

Ítøkiliga snýr málið seg um at seta tvey russisk reiðarí, Murman SeaFood og Norebo JSC, á svartalista. Bæði reiðaríini eiga skip, sum í dag fiska sambært galdandi fiskiveiðusáttmála millum Føroyar og Russland.

- Verða føroyskar havnir missbrúktar at fáa vørur inn til Russlands, so skal tað ikki ganga, segði Bjarni Hammer, formaður í Uttanlandsnevndini, eftir fundin har PET var við.

Og fyrr í hesum mánaðinum var eisini landsstýrismaðurin í fiskivinnumálum boðsendur at møta í Uttanlandsnevndini. 

Lógaruppskotið um víðkaðar revsiheimildir móti Russlandi varð lagt fyri løgtingið 14. august. 

Tað var beint í Uttanlandsnevndina eftir 1. viðgerð 28. august, og nevndin hevur í hesum umfari fingið longda freist til 29. oktober at koma við sínum áliti.