Knívstunga í Onglandi: Annar maðurin latin leysur

Ein 32 ára gamal maður er framvegis fongslaður, undir illgruna fyri at hava stungið 10 fólk í einum toki á veg úr Peterborough til Huntingdon í Cambridgeshire í Onglandi.

Stutt eftir hendingina vóru tveir menn handtiknir, men í gjár var 35 ára gamli maðurin, sambært bretsku løgregluni, latin leysur, tí hann er reinsaður fyri illgruna.

Talan er um ein mann, sum er føddur og uppvaksin í Onglandi, og sambært løgregluni er hann tann einasti, sum er knýttur at hendingini. 

Av teimum 10, sum vóru stungin, vóru í fyrsta umfari tvey í lívsvanda, men í gjárkvøldið var bara ein í lívsvanda.

Tað er enn ógreitt, hví álopið hendi. 

Maðurin, sum nú er afturhildin, fór í tokið í Peterborough. Sambært miðlunum er talan um ein littan, bretskan mann.