Nýskipanarnevndin klár við fyrstu tilmælunum

Nýskipanarnevndin, sum løgmaður fyri tveimum mánaðum síðani setti til at gera tilmæli um nýskipanir í almenna geiranum, hevur í morgin fund við forfólkini í politisku flokkunum og við fíggjarnevndina hjá løgtinginum.

Útvarpið skilir, at fundurin verður fyrrapartin i morgin, men eingin fæst at siga, hvat er á fundarskránni.

Eftir hvat skilst, hava tingbólkafundir verið í dag um uppskot til sparingar, sum nýskipanarnevndin fer at mæla til.

Norðlýsið skrivar í dag, at millum uppskotini hjá nýskipanarnevndini er, at trý landsstýrisfólk skulu sigast upp. Norðlýsið skrivar, at Umhvørvismálaráðið og Løgmálaráðið fara í søguna.

Tíðindini eru ikki váttað.

Fakfólk manna nevndina

Aksel V. Johannesen, løgmaður setti fyrst í septembur eina nevnd við fakfólkum, sum eru vald eftir tilmæli frá politisku flokkunum.

Í nevndini eru Ben Arabo, sum er formaður, Marita Rasmussen, stjóri á Havstovuni, Heri á Rógvi, stjóri í Lóðri, Hjørdis Gaard Lailudóttir, stjóri í Movera, Óluva Klettskarð, undirvísari á Miðnámi á Kambsdali og Selfoss, formaður í Starvsfelagnum.

Harumframt eru John Rajani, løgmansstjóri, og Bjarni Askham Bjarnason, aðalstjóri í Fíggjarmálaráðnum, eisini partur av nevndini.