U21: Ein trupul uppgáva

Fyri fyrstu ferð í nýggjari tíð skal U21-landsliðið spæla venjingardyst. Tað verður undan EM-undankappingardystinum móti Fraklandi, sum verður 17. novembur á útivølli. Føroyar spæla 13. novembur venjingardyst móti Ungarn.

Tað verður uttan tveir av mest spennandi ungdómslandsliðsspælarunum, sum vit hava. 17 ára gamli Dávid Reynheim, sum spælir í italska Torino, og 18 ára gamli Aron Benjaminsen, ið spælir við norska Kristiansund, fara við U19-landsliðnum til EM-undankapping í Ungarn.

Hartil er áleyparin hjá B68, Jóhan Josephsen, skaddur. Í teirra stað eru komnir Marjus Nón og Djóni Samuelsen úr B68 og Thomas Bjørn Miezan úr EB/Streymi. Føroyar taptu heili 6-0 móti Fraklandi seinast og venjarin, Ólavur Mikkelsen, væntar ein minst líka so harðan dyst hesa ferð.

- Tað var ein trupul dystur og tað verður tað aftur hesa ferð. Tú vónar altíð, tá tú møtur so sterkari mótstøðu, at teir ikki eru heilt dystarsinnaðir, men tað vóru teir. Tað var fyrsti dysturin í undankappingini hjá teimum, og seinast Frakland var her, endaði tað við javnleiki. Tí vóru teir tendraðir og góvu alt teir høvdu. Tað vænta vit aftur, so vit mugu royna at verða skarpari upp á okkara ting, segði Ólavur Mikkelsen, U21-landsliðsvenjari.

Føroyar hava 9 stig fyri fimm dystir í EM-undankappingini. Føroyar vunnu á Estlandi, Íslandi og Luksemborg, og hava tapt móti Fraklandi og Sveis.