Samskiparin í Verkafólki: Bara løgmaður kann stytta arbeiðsvikuna

Í gjár fekk Kringvarpið sms-boð frá Aksel V. Johannesen, løgmanni, har sagt verður, at:

"Undirtøka er ikki í samgonguni at stytta arbeiðsvikuna við lóg. Javnaðarflokkurin heldur framvegis, at tað er neyðugt at stytta arbeiðsvikuna og vónar, at tað verður sett hol á tilgongdina í hesum valskeiðnum".

Í samgonguskjalinum hjá sitandi samgongu millum Javnaðarflokkin, Tjóðveldi og Framsókn er m.a. avtalað, at:

"Arbeiðsvikan verður stytt niður í 37 tímar. Trípartasamráðingar verða tiknar upp um at stytta arbeiðsvikuna við einum tíma annaðhvørt ár, til hon er komin niður á 37 tímar. Arbeiðsvikan verður skipað við lóg."

Í ískoyti til frágreiðing løgmans á ólavsøku í ár verður sagt, at hildið verður fram við arbeiðnum at stytta arbeiðsvikuna, hóast at tað hevði tikið longur tíð enn ætlað.

Tað krevur meiriluta í Løgtinginum at fáa lógir samtyktar. Aksel V. Johannesen sigur, at hann hevur ikki neyðugu politisku undirtøkuna til at fáa málið samtykt. So er spurningurin, um tað yvirhøvur ber til hjá honum at fáa undirtøku fyri at stytta arbeiðsvikuna.

Sonja Jógvansdóttir heldur ikki, at arbeiðsvikan skal styttast við samráðingum, sum onkur hevur lagt upp til.

Hoyr meira í innslagi í útvarpstíðindunum: