Politiið í Klaksvík finst at miðsavning í Havn

- Vit eru undirmannað, og arbeiðsgleðin er bankað í botn.

Tað er boðskapurin hjá Jan Poulsen, støðleiðara á politistøðini í Klaksvík, í eini grein á heimasíðuni hjá Dansk Politi, sum er fakblaðið hjá danska politistafelagnum, Politiforbundet.

Í greinini verður millum annað funnist harðliga at miðsavningini av politinum í Havn. Har verða allar avgerðir tiknar, og eisini vaktarplanurin fyri støðina í Klaksvík - sum sambært støðleiðaranum umfatar ov fá løgreglufólk - verður gjørdur í Havn.

Miðsavningin rakar hart, sigur Jan Poulsen við Dansk Politi.

- Arbeiðsumhvørvið er í fríum falli. Tá møtt verður til arbeiðis, ánar tú ikki, hvørjum tú møtir saman við, og um nakar er at møta saman við. Ofta verður tú sendur til Havnar uttan nakað veruligt endamál, so ofta er ongin heima her á støðini, sigur hann.