Revsiheimild hongur saman við fiskiveiðisamráðingum

Næstu vikurnar vilja vísa, hvørja lagnu fiskiveiðisamstarvið við Russland fær. Seinnapartin samtykti løgtingið endaliga, við 3.viðgerð, at geva landsstýriskvinnuni í uttanríkismálum víðkaðar heimildir at seta revsitiltøk í verk móti Russlandi.

Tvær avmarkingar fylgja við. Heimildin kemur ikki í gildi fyrr enn 1. januar 2026. Og Sirið Stenberg, landsstýriskvinna í uttanríkismálum, skal ráðføra seg við uttanlandsnevndina hjá løgtinginum, áðrenn hon brúkar heimildina.

-Vit fara nú at brúka næstu tíðina til at meta um støðuna. Men á ein ella annan hátt hongur tað saman at fara til fiskiveiðisamráðingar og hava somu revsiheimild sum onnur lond, sigur Sirið Stenberg, sum tó ikki vil siga meira ítøkiligt, hvat hon fer at brúka nýggju heimildina til.

Í lógaruppskotinum, sum nú er endaliga samtykt og avgreitt frá løgtinginum, verður ítøkiliga nevnt at seta tvey russisk reiðarí - Norebo og Murman Seafood - á svartalista, so tey ikki longur hava loyvi at fiska í føroyskum øki.

Eftir ætlan fara Norra og Russland til samráðingar um fiskastovnarnar í Barentshavinum í næstu viku. Og síðani standa Føroyar næst í røðini.

Tað verður Eirikur í Jákupsstovu, sum í gjár tók við sum landsstýrismaður við ábyrgd av fiskivinnuni, ið skal standa fyri samráðingunum:

-Eg haldi at vit skulu vera sera varin við at meta um, hvat kann ávirka hvat í eini komandi samráðing, sigur Eirikur í Jákupsstovu, sum í næstum skal ráðføra seg við uttanlandsnevndina, áðrenn hann bjóðar Russlandi til samráðingar. 

Við 3. viðgerð seinnapartin vóru 29 fólk í tingsalinum - 17 atkvøddu fyri og 12 ímóti. Samgonguflokkarnir vóru fyri, stóru andstøðu flokkarnir vóru ímóti - og Miðflokkurin átti eina atkvøðu fyri og eina ímóti.