Russland: Fiskiveiðiavtalan við Føroyar er í vanda

Russland ávarar nú Føroyar um, at fiskiveiðiavtalan frá 1977 er í vanda, um landsstýrið brúkar víðkaðu revsiheimildina móti Russlandi.

Maria Zakharova, talskvinna fyri russiska uttanríkismálaráðið, sigur við tíðindastovuna Reuters, at "nýggja og óvinarliga" stigið hjá Føroyum setur spurnartekn við bindingarnar og trúfesti hjá Føroyum í fiskiveiðuavtaluni við Sovjetsamveldið, ið gongur heilt aftur til 1977. 

Lógin, sum løgtingið samtykti týsdagin, gevur ítøkiliga landsstýrinum heimild at útihýsa reiðaríunum Murman Seafood og Norebo frá at fiska í føroyskum sjógvi. 

Sambært Reuters ávarar Russland um, at landið fer at svara aftur, um revsiheimildin verður brúkt.