Viðgera nýtt uppskot um Suðuroyartunnilin seinnapartin

Lógaruppskotið um Suðuroyartunnilin kemur til 1.viðgerð í løgtinginum seinnapartin. 

Landsstýrið biður um heimild at fyrireika, projektera og bjóða út arbeiðið at gera Suðuroyartunnilin. Sambært lógaruppskotinum kostar tað arbeiðið umleið 70 milliónir krónur

Í viðmerkingunum til lógaruppskotið stendur, at endamálið er at staðfesta politiska semju um at fara undir at fyrireika, prosjektera og bjóða út verkætlanina.

70 milliónir dýrari

Samlaða verkætlanin er mett at kosta umleið 4,9 milliardir krónur í dagsins prísum. 

Broytta linjuføringin í Sandoynni dýrkar verkætlanina umleið 70 milliónir, sammett við uppskotið, sum varð sent í almenna hoyring herfyri. Endaliga prísin fyri samlaðu verkætlanina kennir tó eingin, fyrr enn arbeiðið er bjóðað út. 

Eftir 1.viðgerðina í dag verður lógaruppskotið um Suðuroyartunnilin beint í fíggjarnevndina.