Suðurkorea gevst at ættleiða til onnur lond

Suðurkoreanska stjórnin fyrireikar seg nú til at gevast við altjóða ættleiðingum.

Ættleiðingar minka so líðandi og halda uppat í 2029, boðar suðurkoreanska stjórnin frá.

Frameftir verða altjóða ættleiðingar bert loyvdar í serligum førum, har mannagongdir verða gjørdar beinleiðis við útlendskar stjórnir, skrivar The Korea Herald.

Avgerðin hevur til endamáls at verja rættindi hjá børnunum, sum landið hevur høvuðsábyrgd av, sigur Lee Seu-ran, suðurkoreanski varaheilsumálaráðharrin.

Sambært hagtølum frá suðurkoreanska heilsumálaráðnum, er talið á altjóða ættleiðingum úr Suðurkorea farið úr 2.101 niður í 24 ættleiðingar seinastu tjúgu árini.

Í juli-mánaði fór landið formliga undir eina almenna skipan, sum flutti leiðsluna av ættleiðingum frá privatum stovnum til miðfyrisitingina og kommunur.