Norðurlendskir forsætisráðharrar stuðla Danmark í málinum um Grønland

Norðurlond stuðla áheitanini hjá danska forsætisráðharranum á USA um gevast við at hótta Danmark og Grønland.

Tað siga svenski forsætisráðharrin, Ulf Kristersson, norski forsætisráðharrin, Jonas Gahr Støre og finski forsetin, Alexander Stubb, í uppsløgum á miðlinum X.

Boð teirra koma, eftir at Metta Frederiksen í gjárkvøldið bað USA um at gevast við at hótta Danmark og Grønland.

- Tað er púra burturi úr vón og viti at tosa um, at USA skal yvirtaka Grønland. USA hevur ongan rætt til at innlima nakra av teimum trimum tjóðunum í danska ríkinum, segðu Metta Frederiksen, sambært bretska kringvarpinum, BBC.

Mynd av Grønlandi í amerikonskum litum

Boð hennara komu eftir at kona ein av hjálparmonnunum hjá Trump, Stephen Miller, Katie Miller, hevði lagt eina mynd út av Grønlandi í amerikonskum litum, og við tekstinum SOON - Skjótt.

Trump hevur ferð eftir ferð nevnt møguleikan, at Grønland skal gerast partur av USA.

Og um vikuskiftið endurtók Trump í samrøðu við amerikanska miðilin, The Atlantic, at USA tørvar Grønland.

Alexander Stubb, finski forsetin, hevur á miðlinum X skrivað:

- Eingin tekur avgerð fyri Danmark og Grønland uttan Danmark og Grønland sjálvi. Norðurlendski vinur okkara, Danmark, og forsætisráðharrin, hava okkara fulla stuðul.

Jens-Frederik Nielsen, Demokraatit

Jens-Frederik Nielsen, landsstýrisformaður í Grønlandi. 

Biður fólk um at sissa seg

Grønlendski landsstýrisformaðurin Jens-Frederik Nielsen bað um vikuskiftið fólk um at sissa seg.

- Ongin orsøk er at stúra ella at kenna seg ótryggan, skrivaði grønlendski landsstýrisformaðurin á sín Facebook-vanga.

- Land okkara er ikki til sølu, og framtíðin verður ikki avgjørd av uppsløgum á sosialum miðlum, skrivar landsstýrisformaðurin, sum sigur myndina hjá Katie Miller mangla virðing.

Rasmus Brun Pedersen, sum er danskur lektari í altjóða viðurskiftum,  heldur tó, at danir og grønlendingar eiga at síggja boðskapin frá Katie Miller sum eina hóttan.

- Hetta er eitt tekin um at kreftir nærhendis forsetanum arbeiða fyri at víðka amerikanska landaøkið, og at tað er upp á okkara rokning, sigur Rasmus Brun Pedersen við  danska TV2.