Sveis frystir ognir hjá Maduro inni

Sveis frystir inni allar ognir hjá Nicolas Maduro, sum er koyrdur frá sum forseti í Venesuela, og hjá øllum, sum kunnu setast í samband við Maduro.

Tað boðar sveisiska stjórnin frá, sambært Reuters.

Revsitiltakið um at innifrysta ognir kemur, eftir at USA leygardagin leyp á Venesuela, tók Maduru og konu hansara til fanga, og flutti tey av landinum. 

Fyri rættin í dag

Maduro og kona hansara koma fyri rættin á Manhattan í New York í dag. Tey eru millum annað ákærd fyri rúsevnasmugling.

Ognirnar hjá Maduro vera innifrystar alt fyri eitt, og tær eru innifrystar í fýra ár.

Tað verður ikki upplýst, hvussu stórar ognir Nicolas Maduro og fólk, sum kunnu setast í samband við hann, eiga í Sveis.