Hava landað fyrsta svartkjaftin úr føroyskum sjógvi

Fyrsta svartkjaftalastin úr føroyskum sjógvi í ár er landað í Íslandi.

Grønlendska skipið Polar Amaroq landaði 2.000 tons á Norðfjørðinum.

Svartkjafturin var fingin sunnan fyri Føroyar. Teir høvdu fýra stutt tóv.

Svartkjafturin er veruliga góður, sigur skiparin við heimasíðuna hjá Síldarvinnsluni.

Byrjaðu túr í síðstu viku

Íslendsk uppsjóvarskip fóru longu í síðstu viku á svartkjaftaveiðu í føroyskum sjógvi.

Tað ljóðaði tá, at fiskiveiðuavtalan millum Føroyar og Ísland var komin undir land.

Okkurt teirra vendi aftur til Íslands, tí eingin avtala kom - ikki fyrr enn í gjár - og nøkur hava bíðað í føroyskum havnum.

Lítil lodnukvota

Føroyska lodnukvotan í íslendskum sjógvi verður ikki stór í ár.

Hon verður 1.552,3 tons.

Íslendska kvotan er ásett at vera 31.046 tons. Og føroyingar eiga fimm prosent av tí.

Er kvotan minst 500.000 tons, er føroyska kvotan 30.000 tons.