Biðja nú um loyvi at fáa málið um umval fyri landsrættin

Í dag ella í morgin fer Fíggjarmálaráðið at søkja um at fáa Eystara landsrætt at taka støðu til málið um umval í Runavíkar kommunu.

21. novembur í fjør boðaði táverandi Løgmálaráðið frá, at umval skuldi vera í Runavíkar kommunu, tí løgreglan hevði reist ákæru móti einum fólki um valsvik á kommunuvalinum árið fyri.

Umvalið bleiv av ongum, ið hvussu so er fyribils, tí 9. januar gav Føroya rættur fimm býráðslimum viðhald í, at avgerðin um umval skuldi hava steðgandi virknað, meðan málið um valsvik verður viðgjørt. Tað málið kemur eftir ætlan fyri í rættinum seint í februar.

Fíggjarmálaráðið hevur boðað frá, at tað fer at søkja Procesbevillingsnævnet um loyvi at skjóta málið inn fyri Landsrættin.

Jónas Tór Næs, advokatur fyri Fíggjarmálaráðið, sigur við Kringvarpið, at hann arbeiðir við umsóknini, og at hon verður send í dag ella í morgin.