ES útsetir handilsavtalu við USA

Ein meiriluti í ES-tinginum atkvøddi í gjár fyri at útseta góðkenningina av handilsavtaluni við USA.

Hetta verður gjørt eftir seinastu hóttanirnar frá amerikanska forsetanum, Donald Trump, um revsitoll, tí evropisku londini ikki taka undir við, at hann kann taka Grønland.

Tað skrivar franska blaðið Le Monde.

Sambært Iratxe Garcia Perez, sum er forkvinna fyri sosialdemokratiska bólkin í ES-tinginum, er tað ein meirilutaavgerð millum politisku bólkarnar í ES-tinginum, sum ger, at nýggja handilsavtalan, sum varð gjørd í fjør, ikki verður sett í gildi.

Le Monde skrivar, at eisini høgravongurin í tinginum, Evropiski Fólkaflokkurin, EPP, hevur váttað, at tingið bíðar við handilsavtaluni.

Tollurin á amerikanskum vørum skuldi strikast

Nýggja avtalan varð gjørd í fjør summar, og í henni stendur, at ES skal rinda 15 prosent í tolli av útflutningi til USA. Hinvegin sigur avtalan eisini, at ES strikar tollin á amerikanska útflutninginum til ES.

Manfred Weber, sum er leiðari í EPP-bólkinum, sigur, at tað at forða amerikonskum fyritøkum tollfría atgongd til evropiska marknaðin, er eitt sera sterkt vápn. Og hann fær fulla undirtøku frá Valérie Hayer, sum er forkvinna í politiska miðbólkinum í ES-tinginum.

- Tað er eitt sera sterkt vápn. Eg haldi ikki, at fyritøkurnar eru sinnaðar til at lata evropiska marknaðin fara fyri skeytið, sigur hon.

Avgerðin hjá ES-tinginum merkir, sum sagt, at ES ikki setur handilsavtaluna við USA í gildi.