Kunnu fáa samansparing útgoldna fyri fólkapensjónsaldur

Nú skal bera til hjá fólki, sum hava skerdan arbeiðs- og vinnuførleika, at fáa útgoldið privata eftirlønarsamansparing, áðrenn tey koma í fólkapensjónsaldur.

Tað ætlar landsstýriskvinnan í fíggjarmálum, sum hevur lagt uppskot um at broyta eftirlønarlógina fyri løgtingið. 

Talan er um fólk, sum nærkast pensjónsaldri, og hava fingið tillutaða framskundaða pensjón ella fyritíðarpensjón.

Lógaruppskotið leggur upp til, at tey kunnu fáa útgoldið sína privatu eftirlønarsamansparing trý ár fyri fólkapensjónsaldurin.

Fer ikki at loysa seg hjá øllum

Í viðmerkingunum til lógaruppskotið upplýsir Fíggjarmálaráðið, at tað fer ikki at løna seg hjá øllum at fáa pensjónssamansparingina útgoldna.

Tí noyðist hvør einstakur at gera av, um tikið verður av nýggja møguleikanum. 

Fólk, sum hava framskundaða pensjón ella fyritíðarpensjón, kunnu í 2026 hava 106.000 kr. í árligari inntøku, áðrenn pensjónin lækkar. Mótroknað verður við 30 prosentum av inntøkuni, sum er størri enn 106.000 krónur.

Uppskotið var lagt fyri løgtingið í gjár, og kemur til 1. viðgerð hósdagin í næstu viku.

Les uppskotið her.