Epstein-skjøl: Peter Mandelson fer úr Labour-flokkinum

Sambært skjølum er líkt til, at Epstein rindaði íalt 75.000 dollarar í trimum ymiskum flytingum í 2003 og 2004, skrivar BBC

Peter Mandelson hevur gjørt av at taka seg úr Labour-flokkinum.

Mynd: Jaimi Joy/Reuters/Ritzau Scanpix

Elin S. Winther Poulsen

02.02.2026 - 09:31

Bretski politikkarin, Peter Mandelson, hevur tikið seg úr Labour-flokkinum, eftir at amerikanska løgmálaráðið almannakunngjørdi nýggju Epstein-skjølini.

Tað skrivar bretska kringvarpið, BBC.

Sambært skjølunum sær út til, at Epstein rindaði íalt 75.000 dollarar í trimum ymiskum flytingum í 2003 og 2004, skrivar BBC.

Í skrivi til aðalskrivaran í Labour-flokkinumsigur Peter Mandelson, Lord Mandelson, at hann heldur ikki, at uppáhaldini um fíggjarligu gjøldini frá Epstein til sín, eru røtt, og hann sigur seg ikki minnast, ella hava prógv fyri flytingunum, sum hann nú sjálvur fer at kanna.

- Meðan eg geri tað, vil eg ikki seta flokkin í ringa støðu, og tí meldi eg meg úr flokkinum, sigur Peter Mandelson sambært BBC.

Ríkmaðurin, Jeffrey Epstein, varð ákærdur fyri kynslig brot móti børnum og fyri menniskjahandil, áðrenn hann í 2019 tók seg sjálvan av døgum í fongslinum.