Fosturforeldur fáa 1300 krónur meira um mánaðin

Fosturforeldur skulu fáa meira fyri at hava børn í fostri.

Gjaldið fyri vistarhald og klæði verður tað, sum gjaldið hevði verið, um tað var javnað trý prosent um árið, frá 2015 til 2025.

Fosturforeldur fáa tí 1.300 kr. meira um mánaðin.

Barna- og Útbúgvingarmálaráðið legði fram uppskot um hetta á løgtingsfundinum í gjár.

Og nú koma allar samsýningar og veitingar til fosturforeldur lógina, ikki í kunngerð sum higartil. 

Javnaðar á hvørjum ári

Upphæddirnar vera javnaðar hvørt ár sambært lógini um javningarprosent til almannaveitingar.

Sambært Kommunufelagnum eru í miðal 85 børn til fosturs.

Kommunurnar rinda fosturforeldrum samsýningar. 

Tað fer at kosta kommununum 1,3 mió. kr. at hækka gjaldið.

Kommunurnar hava sjálvar skotið upp at hækka gjaldið.