NSÍ, B68 og EB/Streymur leggja afturat hópinum

Tað nærkast til landskappingarbyrjan í Meistaradeildini hjá monnum í fótbólti. Feløgini hava nú minni enn ein mánað at fáa allir undirskriftirnar upp á pláss. Seinastu dagarnar hava NSÍ, B68 og EB/Streymur fingið tilgongd.

 

Svenskur málverji til NSÍ

NSÍ skrivaði í vikuni undir sáttmála við svenska málverjan Tom Amos. Málverjin er 28 ára gamal og hevur gjørt sáttmála fyri komandi kappingarár, boðar NSÍ frá.

Karstin Joensen, formaður í NSÍ, og Tom Amos (Mynd: NSI.fo)

 

- Tom hevur fingið sína fótbóltsuppaling í IFK Gøteborg, har hann hevur spælt við U17 og U19-liðnum. Sum vaksin hevur Tom Amos fyrst og fremst spælt í næstbestu og triðbestu deildini í Svøríki, umframt eitt ár í Hapoel Beer Sheva, sum spælir bestu deildini í Ísrael, skrivar NSÍ.

Tom Amos er 196 sentimetrar høgur og verður lýstur sum ein málverji, ið dugur væl at standa á røttum stað, er róligur, góður at samskifta á vøllinum og hevur góðar førleikar við føtrunum. NSÍ lat í fjør lutfalsliga nógv mál inn. Nú er kapping á málmanspostinum, tí felagið hevur longu Kristian Joensen, sum hevur vart málið seinastu árini.

 

Serbiskur miðvallari til B68

Á Toftum er stór útskifting. Venjaratoymið er nýtt og fleiri nýggj andlit eru í hópinum. Millum annað Nicolai Dohn, Ahmed Latif, Torkil Úlvur Holm, Teitur Knudsen og Ramzi Toure Idrissou. Nýggjasta andlitið í hópinum er Jovan Goronjic.

- B68 hevur skrivað undir sáttmála við 21 ára gamla serbiska miðvallaran Jovan Goronjic.

Jovan Goronjic er nýggjur í hópinum hjá B68 (Mynd: B68.fo)

 

Jovan er ein spennandi og kreativur offensivur miðvallari, sum fer at styrkja um liðið framrættað. Hann hevur áður spælt við Borac Čačak og Javor Ivanjica í Serbia, skrivar B68.

Nýggjur venjari er Aleksandar Jovevic. Nakrir av lyklaspælarunum farnu árini eru vekk. Millum annað tvíburarnir Bárður og Aleksandur Ó. Jensen.

 

Tríggir nýggir til EB/Streym

EB/Streymur hevur fingið tilgongd av trimum nýggjum spælarum. Teir eru Laurits Nørby, Ba Lamin Sowe og Marius Kallestrup Nielsen. Sáttmálin við Laurits Nørby er galdandi fyri bæði 2026 og 2027.

- 21 ára gamli Laurits Nørby er 198 sentimetrar høgur. Hann er ein skjótur og sterkur verjuspælari, sum er tryggur í nærdystum. Laurits hevur áður umboðað Hobro í donsku 1. deild og Fjølnir í íslendskum fótbólti, skrivar EB/Streymur.

Niels Pauli Danielsen, ítróttarstjóri, og Laurits Nørby (Mynd: EB/Streymur)

 

22 ára gamli Ba Lamin Sowe úr Gambia hevur eisini gjørt ein tvey ára sáttmála. Hann er fyrrverandi U20-landsliðsspælari hjá Gambia.

- Hann er ein fjølbroyttur leikari, sum kann dekka fleiri pláss, millum annað báðar kantarnar og vinstra bakk. Hann er sterkur á bóltinum og hevur øgiliga renniorku. Vit síggja stórt útviklingspotentiali í Ba Lamin, og vænta, at hann kemur at styrkja væl um okkara hóp, sigur ítróttarstjórin, Niels Pauli Danielsen.

Triði spælarin er 20 ára gamli Marius Kallestrup Nielsen. Miðvallarin er uppvaksin í Silkeborg IF og hevur síðani spælt í lægri deildunum í Danmark. Seinast spældi hann við Kjellerup IF í danmarkseriuni.

- Marius er ein rennisterkur box til box leikari. Hann er sterkur á bóltinum og ein móti einum, og hevur eitt gott spark. Vit eru fegin um at knýta hann til okkara hóp, sigur Niels Pauli Danielsen við heimasíðuna hjá EB/Streymi.

Fyrsti dysturin í Meistaradeildini 2026 verður fríggjadagin 6. mars.