FMA 2026: Ása átti ársins tekst

"Eina aftrat" eftir Ásu Helenu Brynjarsdóttir er ársins tekstur. Tað hevur dómsnevndin til FMA avgjørt. 

Teksturin vann á "Kærleikin" eftir Elinborg Pálsdóttir, "Summar nætur" eftir Lyon Hansen, "The Benefactor" eftir Jón Klæmint Hofgaard og "Patio" eftir Marionnu W. Nagata. 

Tað var ein rørd Ása Helena Brynjarsdóttir, ið tók ímóti heiðurslønini. 

"Eg  var max pressað, tá eg skrivaði tekstin, tí eg sat inni á lærarakóntórinum á Glasi, tá eg skrivaði hann," greiddi hon frá. 

Ein aftrat
Ása Helan Brynjarsdóttir

Svara telefonin tá eg ringi til tín,
vil bara hoyra málið, nú hon skjótt nærkast trý
Er kvøldið av, er náttin ung?
Vildi bara vita, um nakað er komið upp, eri eg beint her
 
Gangi runt og samli fløskur,
nú tú aftur trýr tú ikki dettur útí aftur,
um tú fært tær eina lítla, og eina aftrat,
bara eina aftrat

Fimmogfjøruti minuttir síðan tú var online
Hvussu longi skal eg bíða inntil at tú kemur heim?
Er kvøldið av, er náttin ung?

Vildi bara vita um nakað er komið upp,
standi eg her, eg havi ongan skund

Gangi runt og samli fløskur,
nú tú aftur trýr tú ikki dettur útí aftur,
um tú fært tær eina lítla, og eina aftrat,
bara eina aftrat, bara eina aftrat