Vikugesturin: Tá ið trúgvin er alt

- Hesin ivin og hetta stríðið onkursvegna rótfesti meg enn djúpri í Jesus og Guds orð. 

Sum tannáringur hevði hann tunglyndi, var bundin at telduspølum og ivaðist í trúnni. Niðurstøðan bleiv, at einki annað gav meining. 

Steffan Klein Poulsen bleiv í vikuni formaður í Miðflokkinum, sum hevur eina serstøðu í føroyskum politikki sum flokkurin, ið byggir allan sín politikk á kristna grundstøði. Og hann sigur sum er, at hansara trúgv fyllir alt í hansara lívi. Eisini í politikki.

Hóast hann er hampuligur, sjáldan loypir framav og roynir at kjakast virðiliga, so viðgongur hann, at hann hevur temperament. Og tað kemur serliga til sjóndar, tá ið hann spælir spøl ella innandura fótbólt.

- Steffani dámar øgiliga væl at spæla, og tá hann spælir, so vil hann vinna, sigur konan Rebekka Fuglø Poulsen, ið er kend sum rennari.

- Har havi eg mangan stutt fjús, viðgongur Steffan Klein Poulsen.

Steffan Klein Poulsen er úr Hvannasundi, og hann hevur flutt seg yvir um sundið til Norðdepil, har hann býr í dag saman við konuni. Hann viðgongur, at hann hevur ikki ta stóru trongdina at síggja heimin, tí hann hevur tað best heima.

Hoyr alla samrøðuna við Steffan Klein Poulsen, nýggja formann Miðfloksins, har vit tosa um bakgrund, lívsvirði, politisk mál og nýggju støðuna sum formaður.