Fleiri lesandi uttanlands vilja sleppa at velja hesa ferð

Stórur áhugi er føroyingum, sum lesa uttanlands, at sleppa at velja á løgtingsvalinum, 26. mars. 

Higartil hava 696 lesandi føroyingar uttanlands gjørt vart við, at tey vilja sleppa at velja, upplýsir Landsfólkayvirlitið.

Tað merkir, at áhugin hjá lesandi føroyingum uttanlands er nógv størri hesa ferð, enn til valið seinast. Tá valdu 589 lesandi føroyingar at skráseta seg, so talið er meira enn 100 fólk fleiri hesaferð.

Bíða eftir kommununum

Og tey 696 fólkini, sum nú standa á listanum, gerast helst fleiri, sigur Landsfólkayvirlitið. Orsøkin til tað er, at enn hava ikki allar kommunur boðað Landsfólkayvirlitinum frá, hvussu nógv lesandi vilja sleppa at velja.

Freistin hjá kommununum var annars 9. mars, men nú, tríggjar dagar seinni, bíðar Landsfólkayvirlitið framvegis eftir onkrari kommunu.

Lesandi føroyingar hava sambært lóg rætt til at velja til løgtingsval. Treytin er, at tey skráseta seg hjá tí kommunu, sum tey seinast vóru skrásett í, áðrenn tey fluttu uttanlands. Tann freistin var 6. mars.