Innlitsumbøn frá Kringvarpinum skal viðgerast av nýggjum

Løgtingsins umboðsmaður hevur biðið Almanna- og heilsumálaráðið um at viðgera eina innlitsumbøn frá Kringvarpi Føroya umaftur.

Kringvarpið kærdi um, at skjøl vóru hildin aftur, tá ið søkt var um innlit í málið um landsapotekaran, sum segði seg úr starvi.

Víst var til, at nøkur skjøl ikki vóru fevnd av almennum innliti, tí talan var um innanhýsis skjøl.

Eftir at hava kunnað seg um málið og samskift við ráðið, var løgtingsins umboðsmaður ikki samdur. 

Fekk eisini onnur skjøl

Umboðsmaðurin fekk eisini eftir umbøn onnur skjøl enn tey, ið vóru skrásett í málsyvirlitinum, sum ráðið hevði latið.

Løgtingsins umboðsmaður hevur tí heitt á Almanna- og heilsumálaráðið um at umhugsa málið av nýggjum.

Løgtingsins umboðsmaður minnir á, at talan er um umbøn frá fjølmiðli, og Almanna- og heilsumálaráðið verður biðið um at lata umboðsmannin frætta, hvørja niðurstøðu ráðið kemur til.