Steffan Klein Poulsen er nú formliga formaður í Miðflokkinum

Steffan Klein Poulsen hevur í dag formliga tikið við sum formaður í Miðflokkinum.

Tað boðaði Miðflokkurin frá fyri lítlari løtu síðani.

Sambært viðtøkum floksins skal formansval vera eftir hvørt løgtingsval, og valið hevur verið ídag.

Jenis av Rana, sum hevur verið formaður floksins síðani 1998, segði seg úr formansstarvinum, og Steffan Klein Poulsen varð valdur nýggjur formaður fyri flokkin.

Formansskiftið í Miðflokkinum kemur tó ikki óvæntað. Beint eftir løgtingsvalið boðaði Jenis av Rana frá, at hann fór at leggja frá sær sum floksformaður og lata sessin víðari til Steffan Klein Poulsen. Tað hendi so formliga ídag.