Katólska kirkjan í New York skal gjalda 5,1 milliard krónur í endurgjaldi

Filmar eru gjørdir um evnið, og í nógv ár hevur tað javnan verið frammi í miðlunum, at katólskir prestar í USA hava misbrúkt børn.

Av tí sama hava ákoyringarnar móti kirkjuni verið ógvusligar, fyrst og fremst, tí kirkjurnar ikki hava vilja tikið ábyrgd fyri tí, sum er hent. Seinnu árini hava onkur erkabispadømi tó gjørt semju um endurgjald. Tað gjørdi bispadømið í Los Angeles í 2024, tá mann gjørdi eina semju, sum gav offrunum fyri misbrúkinum 5,6 milliardir krónur at býta.

Nú hevur eisini erkabispadømið í New York gjørt semju, sum kemur at kosta 5,1 milliard krónur. Tað skal býtast millum tey 1.300 offrini og verður tað býtt javnt, so fáa tey slakar fýra milliónir krónur í part.

Tað skrivar DR.

Men upphæddin kann gerast størri, tí við semjuni hava offrini fingið heimild til at fara eftir tryggingarfeløgunum hjá bispadøminum, og vinna tey, so kann tað hava við sær, at endurgjaldið verður størri.

Jeff Anderson er ein av sakførarunum hjá 300 av teimum 1.300 offrunum, og hann fegnast um semjuna. Tó finst hann at kirkjuni fyri ikki at taka nóg stóra ábyrgd fyri tí sum er hent.

Trýst á pílin niðanfyri og hoyr innslagið, sum var í tíðindunum á middegi.