- Útgávan er ein roynd at klemma øll tey ófullkomnu brotini í okkum sjálvum

Tú traðkar inn í hitan. Heimurin steðgar eina løtu. Sum at liggja undir einari heitari dýnu, meðan vindurin larmar uttan fyri vindeygað.

Soleiðis stendur í tíðindaskrivi nú Marianna Winter letur fyrstu heildarútgávu sína The More You Know úr hondum.

Saman við einum sterkum bólki spælir hon tríggjar sangir Beinleiðis úr Studio 5.

The More You Know er ikki bara ein pláta. Hon er ein avmyndan av merglopi, eitt heimaband aftur í fortíðina og ein roynd at klemma øll tey ófullkomnu brotini í okkum sjálvum, sigur Marianna Winter.

Útgávan kennist sum eitt gamalt analog heimaband.

Eitt Panasonic mini DV-myndatól, sum hevur fangað allar tær erligu løturnar, og hóast tú vart ov lítil at minnast tær, følist tað sum, tær búgva onkrastaðni inni í tær.

Myndir: Bjarni Árting Rubeksen

Skróv og óljóð av bandinum og digitaliseringini hava avskeplað heildarmyndina og minnið, men kenslan er stjørnuklár enn. Við einum ljóðheimi, sum sameinir indie-folk, popp og rokk við løtum av inniligum indie-bedroom-poppi, er The More You Know eitt soundtrack til uppvøkstur hennara og til øll tey, ið kenna seg mitt ímillum tað, tey vóru, og tað, tey eru um at gerast.


Mynd: Bjarni Árting Rubeksen

Bólkurin í Studio 5 er hesin:

Marianna Winter (sang)
Ragnar Finsson (gittar og sang)
Hjørtur Pætursson Háberg (trummir og sang)
Kristian Pauli Ellefsen (keys)
Michala Sannino (bass og sang)



Hvat: Beinleiðis úr Studio 5
Hvar: Í útvarpinum og á KVF Ljóð
Nær: Fríggjamorgun kl. 9.05 og tá tað passar tær á KVF Ljóð
Hesa ferð: Marianna Winter