Ógreitt um lógarbroyting fer at ávirka støðuna hjá ákæruvaldinum

Ákæruvaldið hevur onga viðmerking til spurningin, um lógarbroytingin í djóravælferðarlógini, sum løgtingið hevur samtykt við triðju viðgerð í dag, fer at gera, at ákæruvaldið fer at sleppa ákærunum móti einum sýslumanni og grindaformonnum í Hvannasundi.

- Vit bíða við at úttala okkum, til lógin er lýst og komin í gildi, sigur Katrin Thorsvig Hansen, høvuðsákæri. 

Løgtingið samtykti við 28 atkvøðum fyri og ongari ímóti seinnapartin, at veiða og fiskiveiða ikki eru fevnd av djóravælferðarlógini.

Vinnunevndin: Kann fáa ávirkan á eldri lógarbrot

Í álitinum frá vinnunevndini stóð, at "undir nevndarviðgerðini er upplýst, at henda lógarbroyting, um hon verður samtykt, fer at hava ávirkan á møgulig mál, sum eru til viðgerðar hjá myndugleikum, sum virka í Føroyum. Hetta kemst av, at sambært revsilógini skulu møgulig eldri lógarbrot, sum ikki eru avgjørd, metast eftir nýggju lóggávuni, um nýggjara lóggávan ikki førir við sær eina harðari avgerð enn tann fyrra."

Um hetta er rætt, skuldi tað havt ávirkan á aktuella málið, har ein sýslumaður og grindaformenn í Hvannasundi eru ákærd fyri at bróta lógina um djóravælferð. 

Grindamannafelagið skrivar, at hetta merkir vónandi, at ákærur ímóti grindafólkum fyri brot á djóravælferðarlógina, nú verða sleptar av ákæruvaldinum.

Men tað vil ákæruvaldið ikki siga nakað um enn. Ákæruvaldið hevur áður sagt, at málið er latið statsadvokatinum.