Kokain-málið: Tey skuldsettu varðhaldsfongslað í fýra vikur

Tey trý fólkini, sum eru skuldsett fyri at hava smuglað í minsta lagi fimm kilo av kokaini til Føroya, og síðani at hava selt meginpartin av rúsevnunum her, eru varðhaldsfongslað í fyra vikur.

Tey skuldsettu vóru í grundlógaravhoyring fyrrapartin.

Talan er um tveir ungar menn, 22 og 23 ára gamlir, og eina 19 ára gamla kvinnu.

Hetta er størsta nøgd av kokaini higartil í einum einstøkum løgreglumáli í Føroyum.

Selt meira enn fýra kilo

Sambært skuldsetingunum skulu tey trý frá september í fjør til 16. apríl í ár hava staðið fyri at smugla í minsta lagi fimm kilo av kokaini til Føroya. 

Hetta hava tey sambært skuldsetingunum gjørt saman, ella saman við øðrum persónum í Danmark, og møguliga eisini í Føroyum. 

Síðani hava tey selt 4.437 gramm av kokaininum í Føroyum, og løgreglan hevur lagt hald á 666 gramm.

Grundlógaravhoyringin í rættinum var fyri afturlatnum hurðum.