Týðaravirðisløn uppkallað eftir Turið Sigurðardóttir

Turið Sigurðardóttir hevur fingið eina týðarvirðisløn uppkallaða eftir sær í New York.

The American-Scandinavian Foundation kunngjørdi í gjár, at tey hava stovnað nýggja virðisløn, sum hevur fingið navnið eftir føroyska bókmentafrøðingin: Turið Sigurðardóttir Translation Prize, sum skal heiðra bestu umsetingarnar úr føroyskum ella íslendskum í enskt.

Heiðurin verður latin longu í ár, og við fylgja 2.000 dollarar, eitt bronsuhálsprýði og útgávu í Scandinavian Review.

Heiðrar Turið fyri ídni

Fyriskipararnir siga, at virðislønin heiðrar Turið Sigurðardóttir, m.a. fyri hennara ídni á Fróðskaparsetri Føroya, har hon hevur granskað í bókmentum, undirvíst, skrivað og umsett, og nevnt verður eisini, at hon hevur verið ein eldhugaður vegleiðari fyri mong.

The American-Scandinavian Foundation hevur eisini aðrar virðislønir um hendi, m.a. Nadiu Christensen-virðislønina, og vinnararnir verða kunngjørdir í tíðarritinum Scandinavian Review.