Flogbóltsmenninir løgdu væl frá landi í Norðurírlandi

Í SCA-kappingini, sum um vikuskiftið er í Norðurírlandi, vann A-landsliðið hjá monnum 3-1 á vertunum úr Norðurírlandi.

Føroyar vunnu fyrsta settið sannførandi 25-15, men eftir at hava verið frammanfyri 15-11 í øðrum setti, kom stígur í hjá Føroyum, og Norðurírland javnaði til 16-16 og vann síðan 25-20.

Føroyar svaraðu tó aftur og vunnu lættliga triðja og fjórða sett 25-15 og 25-14.

Leygardagin á middegi spæla Føroyar ímóti hinum liðnum í bólkinum, Írlandi. Seinni sama dag verða hálvfinalurnar spældar. Við sigrinum í dag hava Føroyar góðan møguleika at koma í hálvfinaluna. Um so verður, verður mótstøðuliðið eitt av teimum trimum liðunum í hinum bólkinum, sum er mannaður við Liktinstein, San Marino og Skotlandi. 

Leinki til stroyming frá kappingni er at finna á heimasíðuni hjá Flogbóltssambandinum, fbf.fo.

SCA-kapping, Norðurírland

Norðurírland – Føroyar 1-3 (15-25, 25-20, 15-25, 14-25)