Heilsustýrið undir átak at koppseta børn fyri HPV

Við slagorðinum  "Tvey prik móti krabba" heitir Heilsustýrið á foreldur um at lata børnini koppseta fyri HPV. 

Nýggja átakið skal økja um HPV-koppsetingina.

Um vit skulu steðga lívmóðurhálskrabba og avmarka onnur krabbameinssløg, má undirtøkan fyri HPV-koppseting økjast munandi, sigur Heilsustýrið. 

Koppsetingin verjir bæði gentur og dreingir móti HPV-smittu, sum kann elva til fleiri krabbameinssløg. 

Viðmælt verður, at børnini fáa koppsetingina, áðrenn tey gerast seksuelt virkin. Tí verður mælt til, at børnini vera koppsett, tá tey eru 12 ár.

Føroysku tølini fyri HPV-koppseting vísa, at undirtøkan er alt ov lítil, nógv minni enn í grannalondunum. Endaligu føroysku tølini fyri 2025 eru ikki klár enn.

Minni enn helvtin liðugt koppsett

Men ábendingar eru um, at minni enn helvtin av 15 ára gomlu gentunum í Føroyum vóru liðugt koppsettar, og enn færri av 15 ára gomlu dreingjunum. 

Málið er, at 90 prosent eru koppsett, áðrenn tey fylla 15 ár.

Gentur í Føroyum hava fingið tilboð um ókeypis HPV-koppseting síðani 2009 og dreingir í 2019. 

Tilboðið um ókeypis HPV-koppseting er galdandi fyri øll børn millum 12 og 17 ár. 

Sum eitt undantak kunnu ung millum 18 og 20 ár eisini fáa koppsetingina ókeypis fram til 31. desember 2026.