Íslendingar flyta útlendskar fangar av landinum

Tíggju útlendskir fangar í íslendskum fongslum, skulu sendast av landinum, skrivar Morgunblaðið.

Teir flestu eru dømdir fyri at royna at smugla rúsevni til Íslands.

Tað eru fólk, sum vera brúkt til at smugla rúsevni.

Talan er bæði um kvinnur og menn, sum einki samband hava við Ísland annars.

Sita ein triðing av tíðini

Ein nýggj lóg, sum fyribils er galdandi til 1. juli næsta ár, gevur loyvi til at lata útlendskar fangar leysar, tá teir hava sitið ein triðing av tíðini.

Teir vera so fluttir av landinum í stundini, og kunnu ikki koma hagar ella í Shengen aftur í ávíst áramál.

20 fólk, sum eru víst úr landinum, sita í Íslandi.

Men tilsamans sita 60 fólk, sum hava fremmandan ríkisborgaraskap, í fongsli í Íslandi. 

Tey, sum vera send av landinum, fara ikki sum fangar. Tey eru tí fræls í heimlandinum.