Todd Blanche tilnevndur løgmálaráðharri í USA

Amerikanski forsetin, Donald Trump, tilnevndi í gjár Todd Blanche nýggjan løgmálaráðharra í USA.

Tað sæst í eini fráboðan frá Hvítu Húsunum til amerikanska Senatið, sum skal góðkenna tilnevningina. 

51 ára gamli Todd Blanche er fyrrverandi persónligur advokatur hjá amerikanska forsetanum, og hevur verið virkandi løgmálaráðharri, síðan forsetin í apríl segði táverandi løgmálaráðfrúuna, Pam Bondi, úr sessinum.

Tilnevningin kemur ikki púra óvart á, tí forsetin boðaði fyri nøkrum døgum síðan frá, at hann ætlaði at gera fyribils tilnevningina av Todd Blanche varandi.

Eydnaðist ikki at stovna grunn

Tíðindastovan Reuters heldur, at tilnevningin av Todd Blanche ber boð um, at forsetin hevur álit á honum, hóast Blanche herfyri mátti gevast við royndunum at stovna ein grunn við útvið 12 milliardum skattafíggjaðum krónum at arbeiða við. 

Grunnurin var ætlaður at hjálpa fólki, sum Donald Trump heldur hava verið fyri politiskari jagstran, meðan demokraturin, Joseph Biden, sat við valdinum seinasta forsetaskeið.

Uppskotið um grunnin elvdi tó til so harða mótstøðu og hvassar atfinningar frá bæði demokratiskum og republikanskum politikarum, at Todd Blanche tók tað aftur.