Eingin friður á Filmsfelagnum: No Rest for the Wicked fyrsti filmur í heyst

Mikukvøldið 2. september klokkan 20 fer Filmsfelagið undir aftur filmssýningar í Havnar bio, og tað verður ikki við mýkindum. 

Fyrsti filmur í heystskránni er nýggi danski-føroyski-ræðufilmurin "No Rest for the Wicked", við Pilou Asbæk og Egor Venned í høvuðsleiklutunum. 

Eiler Fagraklett fer at innleiða sýningina.

Byggir á søguna "Manor"

"No Rest for the Wicked" byggir á søgu hjá týska Karl Heinreich Ulrichs (1825-1895), sum undir heitinum "Manor" fer fram í Føroyum.

Eiler var talsmaður í LGBT+ Føroyum, sum í 2014 gav út týsku søguna "Manor" í føroyskari týðing hjá Hanusi Kamban.

Úr søguni, ið er frá 1885, hevur Rasmus Birch skrivað filmshandritið. 

Djúpar kenslur og ógvusligar hendingar

Vit eru í Føroyum í árinum 1862, har vit fáa innlit í gerandisdagin hjá Baldur (Egor Venned), sum er fiskimaður á bygd. Ein fremmandur maður kemur til bygda, og eftir hetta verður einki sum fyrr.

Hin fremmandi er danski hvalaveiðimaðurin Helgi (Pilou Asbæk), sum vekir nakað í føroyska Balduri. Sum frá líður taka djúpar kenslur seg upp, sum sjónliga spíra teirra millum.

Tá ein sorgarleikur syndrar sambandið, ið hevur verið teirra millum, elvir tað til ógvusligar hendingar. Ræðsla kemur á bygdafólkið, ið tekur seg saman at mana tað illa niður í jørðina.

Men Baldur og Helgi halda fast um kærleikan, sum er sprottin teirra millum. Teir stríðast til deyðan - og enn longur. 

SÍ EISINI: Upptøkur í Kunoy: "No Rest for the Wicked"

Annar filmurin hjá Kasper Kalle

"No Rest For the Wicked" er annar spælifilmur hjá danska leikstjóranum Kasper Kalle. Hin fyrsti var "Christian IV - Kongens sidste rejse" (2018). 

Leikarar eru Egor Venned, Pilou Asbæk, Sofia Nolsøe (Ásla), Kjartan Hansen (Súni), Jóhannes Haukur Jóhannesson (Jákup) og Brimheim.

Lars Bredo Rahbek hevur framleitt fyri fremsta filmsframleiðara í Norðurlondum, SF Studios, saman við Outlier Projects hjá Jón Hammer í Føroyum og íslendska Truenorth.

Charades í París stendur fyri altjóða søluni.

No Rest for the Wicked

SÍ EISINI: Framleiða føroyskan film