Forsetahjúnini vitja í Runavík og Klaksvík í dag

Vitjanin hjá íslendsku forsetahjúnunum heldur fram í dag.

Klokkan eitt korter til tíggju verður vitjað hjá SEV í Húsahaga, og klokkan 10 verður farið í Eysturoyartunnilin.

Síðani verður vitjað í svimjihøllini í Runavík og á Bakkafrosti á Glyvrum. 

Á middegi er Runavíkar kommuna vertur fyri miðmála í Garðahúsinum í Søldarfirði.

Vinnutiltak í Varpinum

Seinnapartin verður vitjað í Klaksvík.

Klokkan 15 verður íslendskt-føroyskt vinnutiltak í Varpinum, og haðani verður farið at vitja Edward Fuglø, listamann. 

Forsetahjúnini fara eisini at vitja kappróðrarneystið og Rótina (Húsarhaldsskúlan), og í kvøld verður Klaksvíkar kommuna vertur fyri døgurða í Rótini. 

Komu í gjár

Halla Tómasdóttir, forseti, og maður hennara, Björn Skúlason, komu til Føroya seinnapartin í gjár.

Av flogvøllinum var farið í Tinganes, har forsetin og Beinir Johannesen, løgmaður, høvdu fund.

Síðani var farið í løgtingið at hitta formansskapin, og í gjárkvøldið var løgmaður vertur fyri døgurða á Hotel Føroyum.