Færri lótu Skrásetingini ársfrágreiðing rættstundis

Lutfalsliga færri føroysk feløg lótu Skráseting Føroya ársfrágreiðing sína rættstundis í ár, enn í fjør.

3.115 av íalt 3.875 vinnufeløgum lótu í ár ársfrásøgnina inn til Skráseting Føroya, áðrenn freistin, sum var 30. juni, var farin. 

Tað sigur Skráseting Føroya í svari uppá ein fyrispurning frá Kringvarpi Føroya.

Í fjør hevði Skráseting Føroya fingið 2.940 ársfrásagnir inn, tá freistin fór. Tá vóru íalt 3.540 feløg, sum skuldu lata roknskap inn.

Lutfalsliga hava færri feløg latið ársfrágreiðingina inn til tíðina í ár samanborið við í fjør. Í ár var talið 80 prosent, í fjør var tað 83 prosent.

Tey 760 feløgini, sum ikki hava latið skjølini inn til tíðina, hava fingið rykkjara frá Skráseting Føroya. Í fjør var tað talið 600.