Leita eftir fyritøkum at gera eykalutir til Tjaldrið

Vørn er nú farið at spyrja seg fyri hjá fyritøkum í grannalondunum, sum hava førleikar at framleiða eykalutir til gamlar skipsmotorar. 

Tað er greitt, at eykalutirnir til Tjaldrið ikki fáast til keyps, men mugu gerast serstakt til skipið.

- Tað kann gerast eitt drúgt arbeiði, men enn hava vit onga tíðarætlan, sigur Jóhan Simonsen, virkandi stjóri á Vørn.

Hann vísir á, at fyrst mugu tey finna eina fyritøku, ið kanngera eykalutirnar rímiliga skjótt. 

Jóhan Simonsen veit tí heldur ikki, hvat tað fer at kosta at umvæla maskinbrekið á Tjaldrinum.

Vørn hevur einki skip tøkt, fyrr enn Brimil kann setast aftur í rakstur, hálvan oktober.

Jóhan Simonsen, Vørn

Vísir til politisku skipanina

Spurdur, um tað kann koma uppá tal at leiga eitt skip at røkja vaktar- og bjargingartænastuna hetta tíðarskeiðið, vísir Jóhan Simonsen til politisku skipanina, sum eigur ta avgerðina. 

Danska verjuskipið "Lauge Koch" er við Føroyar í løtuni.

Stjórin á Vørn veit ikki, hvussu leingi tað verður her. Hann hevur onga avtalu við Arktisk Kommando og heldur einki lyfti um, at "Lauge Koch" verður verandi her, til Brimil er klárur aftur.

- Slíkar avtalur má landssstýrið gera við danir, sigur Jóhan Simonsen. 

Kringvarpið hevur síðstu dagarnar spurt Arktisk Kommando, hvussu leingi "Lauge Koch" kann væntast at vera verandi í føroyskum sjóøki, og um skipið kann røkja tær uppgávur, sum Brimil og Tjaldrið vanliga røkja. Arktisk Kommando hevur ikki svarað enn.