USA ætlar at byggja tvær herstøðir í Grønlandi

USA ætlar at seta upp tvær nýggjar herstøðir í Grønlandi, skriva danska kringvarpið og Reuters.

DR hevur fingið at vita, at USA fer at byggja tvær nýggjar støðir í Grønlandi. Onnur verður í Narsarsuaq har suðuri í Grønlandi.

Tíðindastovan Reuters skrivar eisini, at USA fer at lata upp tvær nýggjar herstøðir. Eins og DR snýr tað seg sambært keldum hjá Reuters um Narsarsuaq.

Narsarsuaq hevði frammanundan eina stóra amerikanska støð, sum kallaðist Blue West One. 

Støðin var virkin frá 1941 til 1958, og fekk flogbreyt, sum seinni varð longd, áðrenn USA læt Danmark støðina, sum síðani varð umbygd til sivila floghavn. 

Reuters skrivar eisini - og endurgevur ónevndar keldur - at hin støðin kann verða bygd í Mestersvig á grønlendsku eysturstrondini. 

Ein donsk serdeild heldur í løtuni til har.

Hava bara eina støð í løtuni

Í løtuni hevur USA bert eina støð í Grønlandi - Pituffik Space Base -  í útnyrðingspartinum av Grønlandi.

Í síðstu viku boðaði amerikanski forsetin, Donald Trump, frá, at ein avtala var gjørd við Danmark, sum gevur USA “varandi ræði á trygdini og øllum øðrum tørvi í Grønlandi”.

Danmark hevur váttað, at avtala er fingin í lag um at styrkja trygdina í Arktis og økinum í Norðuratlantshavi.

Avtalan er ikki almannakunngjørd.

USA, Danmark og Grønland fara eftir ætlan skrva undir avtaluna í New York í dag klokkan hálvgum fýra, okkara tíð.