Mikkjal Thomassen er nýggjur venjari hjá HB

Í gjár kunngjørdi Havnar Bóltfelag, at felagið hevur sett Mikkjal Kjartansson Thomassen sum høvuðsvenjara komandi trý árini. Mikkjal K. Thomassen er uppvaksin í HB og hevur umboðað besta mansliðið.

Sum venjari hevur hann tó verið í kapping við HB. Fyrst sum venjari hjá B36, har hann millum annað vann FM í 2011. Í 2015 fór hann til KÍ, har hann vann bæði Løgmanssteypið og FM. Seinastu árini hevur Mikkjal Thomassen verið venjari hjá norska Fredrikstad og svenska AIK Stockholm.

Í samrøðu við HB sigur forkvinnan, Helga Ellingsgaard, at tey eru fegin um, at Mikkjal Thomassen hevur átikið sær uppgávuna. HB liggur í løtuni á triðja plássi í Meistaradeildini.