Hoyvíkingar skrivaðu hondbóltssøgu

Kvinnurnar hjá H71 spældu seg um vikuskiftið í áttandapartsfinalurnar í evropeisku kappingini, European Cup, tá tær vunnu samanlagt 65-57 sigur á sveisiska liðnum, Spono Eagles.

Samstundis skrivaðu tær føroyska hondbóltssøgu, tí tær, sum tær fyrstu, hava spælt seg framvið tveimum mótstøðuliðum í evropeiskari kapping.

Grundalagið undir samlaða sigrinum varð lagt í fyrsta dystinum, tá H71 vann heili 36-26 ímóti sveisisku ørnunum, hvørs flog var heldur ivasamt. Maria Halsdóttir Weyhe var stóri spælarin við heili 17 málum. 

 - Tað var øgiliga stuttligt, sigur H71-profilurin.

 - Tær vóru ikki ordiliga fyrireikaðar uppá tað, sum eg vanliga ikki sleppi at gera í føroysku kappingini, og tað var øgiliga stuttligt at sleppa at skjóta nøkur undirhondsskot.

Venjarin, Ingi Olsen, heldur, at hoyvíkingar vóru betur fyrireikaðir enn mótstøðuliðið, sum tók ov lætt upp á uppgávuna.

 - Tær komu ikki við nøkrum, sum vit ikki høvdu sæð fyrr, og tað var nokkso týðiligt, at tær vistu ikki, hvat vit komu við, sigur Ingi Olsen.

 .- Tað virkar, sum tær hava tikið eitt sindur lættari upp á uppgávuna, enn tær kanska áttu, leggur Maria Halsdóttir Weyhe afturat.

Bert 16 lið eru eftir í kappingini nú, og alt annað líka, hækkar stigið fyri hvørt umfar. 

 - Eg gangi bara út frá, at øll liðini eru øgiliga sterk, so tað verður torført, heldur Maria Halsdóttir Weyhe. 

Lutakastið, sum avgerð hvussu spælast skal í áttandapartsfinalunum, verður fyrrapartin týsdagin.