Marita og Peter eru best í hálvmaraton

Marita Andrasardóttir og Peter Jensen vunnu føroyameistaraheitið í hálvmaraton um vikuskiftið, tá kappast var á 21 kilometra teininum í Klaksvík.

Fleiri sterkir rennarar vóru ikki við - millum annað vinnararnir frá í fjør, Sarah Vallin og Bjarki Johannessen - so nýggir meistarar skuldu finnast.

Hjá monnum kappaðist Peter Jensen við Henry Olsen, báðir úr Bragdinum. Peter Jensen, sum fyrr í ár eisini vann FM á 10 kilometrum, dróg so líðandi frá og vann við tíðini 1.19.46.

Henry Olsen kom á mál tveir minuttir seinni, og Pauli Poulsen úr Roysninum fekk triðja plássið. 

 - Eg hevði ikki væntað, at tað fór at ganga so væl, men veðrið var frálíkt, og eg rann eftir kropskensluni, sigur Peter Jensen, sum ætlar sær at røkka kravtíðini til Oyggjaleikir á 10 kilometra teininum. 

Hjá kvinnum var eingin, sum kundi bjóða Maritu Andrasardóttir av. Rennarin úr Bragdinum fór frá hinum beinanvegin, og vann við tíðini 1.31.57. Tíggju minuttir seinni kom Ann Mari av Skarði úr Bragdinum á mál, meðan Helga Súsanna Johansen úr Treysti endaði á triðja plássi.

 - Eg hevði vónað, at eg fór at fáa eina betri tíð, sigur Marita Andrasardóttir, sum hevur havt nógvar skaðar at dragast við, men nú er við at koma fyri seg aftur.

marita_mynd.jpg

Frítekst tagging: 

Renning

Frælsur ítróttur

FM í hálvmaraton

Marita Andrasardóttir